ഷാർജ വ്യവസായ മേഖലയിൽ വൻ തീപിടിത്തം; ആളപായമില്ല
ഷാർജ ∙ ഷാർജയിലെ വ്യവസായ മേഖല 7–ലെ സ്‌ക്രാപ് വർക്ക്‌ഷോപ്പില്‍ വൻ തീപിടിത്തം. ഇന്നലെ (ശനി) രാത്രി 11.15നുണ്ടായ തീപിടിത്തം ഷാർജ സിവിൽ ഡിഫൻസ് നിയന്ത്രണ വിധേയമാക്കിയതായി ഡയറക്ടർ ജനറൽ കേണൽ സമി ഖമീസ് അൽ നഖ്ബി പറഞ്ഞു. ആർക്കും പരുക്കേറ്റിട്ടില്ല. സ്ക്രാപ്പ് മെറ്റീരിയലുകൾ അടങ്ങിയ സൈറ്റ് പൂർണമായും കത്തിനശിച്ചു. സമീപത്തെ ജീവനക്കാരെ ഒഴിപ്പിച്ചു. തീ പിടിത്തത്തെ തുടർന്ന് ഇൗ ഭാഗത്തേയ്ക്കുള്ള റോഡുകൾ പൊലീസ് അടച്ചിരുന്നു. അടിയന്തര വാഹനങ്ങൾക്ക് മാത്രമേ പ്രവേശനം അനുവദിച്ചുള്ളൂ.
ഇവിടെ നിന്നുയർന്ന കറുത്ത പുക കിലോമീറ്ററുകള്‍ക്കപ്പുറത്ത് നിന്നും കാണാമായിരുന്നു. തീപിടിത്തത്തിന്റെ കാരണത്തെക്കുറിച്ച് സിവിൽ ഡിഫൻസിന്റെയും ഷാർജ പൊലീസിന്റെയും സംഘങ്ങൾ അന്വേഷണം ആരംഭിച്ചു. തീപിടിത്തത്തിന്റെ കാരണം കണ്ടെത്താൻ ഫൊറൻസിക് ലബോറട്ടറി വിദഗ്ധർ സ്ഥലം പരിശോധിച്ചു.
യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/GXT2k4QZuuVEHWICfCDWRJ
Comments (0)