Pravasiinfo

ലോകത്തിലെ ഏറ്റവും ഉയരം കൂടിയ കെട്ടിടമെന്ന ഖ്യാതിയുമായി, യുഎഇയുടെ അഭിമാനമായി മാറിയ ബുർജ് ഖലീഫയെപ്പറ്റി അറിയാത്തവരുണ്ടാകില്ല. പുരോഗതിക്ക് ഒരു പടി മുമ്പേ സഞ്ചരിച്ചിട്ടുള്ള യുഎഇ എപ്പോഴും വിസ്മയിപ്പിച്ചിട്ടേ ഉള്ളൂ. ഇപ്പോഴിതാ യുഎഇയുടെ പേര് വാനോളമുയർത്താനായി മറ്റൊരു ഉയരമേറിയ കെട്ടിടം കൂടി വരികയാണ്, വെറുമൊരു കെട്ടിടമല്ല- ലോകത്തിലെ ഏറ്റവും ഉയരം കൂടിയ രണ്ടാമത്തെ കെട്ടിടം- ബുർജ് അസീസി.

ബുർജ് അസീസി എന്ന പേര് കേട്ട് തുടങ്ങിയിട്ട് കുറച്ചു നാളുകളായി. ലോകത്തിലെ ഏറ്റവും ഉയരം കൂടിയ രണ്ടാമത്തെ കെട്ടിടത്തിൻറെ നിർമ്മാണ പ്രവർത്തനങ്ങൾ ദുബൈയിൽ പുരോഗമിക്കുന്നതിൻറെ വിവരങ്ങൾ പലപ്പോഴായി പുറത്തുവന്നിട്ടുമുണ്ട്. ബുർജ് അസിസിയുമായി ബന്ധപ്പെട്ട് ഏറ്റവും പുതിയതായി പുറത്തുവരുന്ന വിവരം കൗതുകമുള്ളതാണ്. സഞ്ചാരികളുടെ പറുദീസയായ, ദുബൈയുടെ സൗന്ദര്യം മുഴുവനായും ആസ്വദിച്ച് കഴിയണമെന്ന സ്വപ്നം ഒരിക്കലെങ്കിലും കണ്ടിട്ടുള്ളവരാണോ? എന്നാൽ പുറത്തുവരുന്ന ഈ അപ്ഡേറ്റ് നിങ്ങൾക്കുള്ളതാണ്.

ലോകത്തിലെ ഉയരമേറിയ രണ്ടാമത്തെ കെട്ടിടത്തിലെ അപ്പാർട്ട്മെൻറുകൾ ഉൾപ്പെടെയുള്ള സ്ഥലസൗകര്യങ്ങൾ വിൽപ്പനയ്ക്ക് വെക്കുകയാണ്. ആഗോള തലത്തിലുള്ള സെയിൽ ഏഴ് നഗരങ്ങളിലാണ് സംഘടിപ്പിക്കുന്നത്. നാളെ ഫെബ്രുവരി 19നാണ് വിൽപ്പന തുടങ്ങുന്നത്. സ്വകാര്യ കെട്ടിട നിർമ്മാതാക്കളായ അസിസി ഡെവലപ്മെൻറ്സ് ആണ് ഇക്കാര്യം പ്രഖ്യാപിച്ചിരിക്കുന്നത്. 725 മീറ്റർ ഉയരത്തിൽ നിർമ്മാണം പുരോഗമിക്കുന്ന ബുർജ് അസീസിയിലെ അപാർട്ട്മെൻറുകളടക്കം വാങ്ങാൻ താൽപ്പര്യമുള്ളവർക്ക് നാളെ ഇതിനായുള്ള അവസരം ഒരുങ്ങുകയാണ്. ദുബൈയിലെ കൊൺറാഡ് ഹോട്ടൽ, ഹോങ്കോങ്ങിലെ ദി പെനിൻസുല, ലണ്ടനിലെ ദി ഡോർചെസ്റ്റർ, മുംബൈയിലെ ജെ ഡബ്ല്യു മാരിയറ്റ് ജുഹു, സിംഗപ്പൂരിലെ മരീന ബേ സാൻഡ്സ്, സിഡ്നിയിലെ ഫോർ സീസൺസ് ഹോട്ടൽ, ടോക്കിയോയിലെ പാലസ് ഹോട്ടൽ എന്നിവിടങ്ങളിലായാണ് ബുർജ് അസീസിയുടെ വിൽപ്പന നടക്കുക.

ദുബൈയിലെ ശൈഖ് സായിദ് റോഡിൽ നിർമ്മാണം പുരോഗമിക്കുന്ന ബുർജ് അസീസിക്ക് 131 ലേറെ നിലകളാണ് ഉണ്ടാകുക. ഇതിൽ റെസിഡൻഷ്യൽ, ഹോട്ടൽ, റീട്ടെയ്ൽ, എൻറർടെയ്ൻമെൻറ് സ്പേസുകൾ ഉണ്ടാകും. 2028 ഓടെ ബുർജ് അസീസിയുടെ നിർമ്മാണം പൂർത്തിയാകുമെന്നാണ് പ്രതീക്ഷിക്കുന്നത്. ദുബൈ പോലുള്ള ലോകത്തിലെ വിവിധ നഗരങ്ങളിൽ പുതിയ പദ്ധതികൾ ദിവസേന രൂപംകൊള്ളാറുണ്ട്. എന്നാൽ ബുർജ് അസീസി പോലുള്ള പദ്ധതികൾ ഒരു തലമുറയിൽ ഒരിക്കൽ സംഭവിക്കുന്നതാണ്- അസീസി ഡെവലപ്മെൻറിൻറെ സ്ഥാപകനും ചെയർമാനുമായ മിർവൈസ് അസിസിയുടെ വാക്കുകളാണിത്.

ബുർജ് അസീസി ചില റെക്കോർഡുകൾ കൂടി സ്വന്തമാക്കുമെന്നാണ് അസിസി ഡെവലപ്മെൻറ്സ് അവകാശപ്പെടുന്നത്. ഉയരം കൂടിയ ഹോട്ടൽ ലോബി, ഉയരം കൂടിയ നൈറ്റ് ക്ലബ്ബ്, ഉയരമേറിയ റെസ്റ്റോറൻറ്, ഉയരമേറിയ ഹോട്ടൽ മുറി എന്നീ റെക്കോർഡുകളാണ് ബുർജ് അസീസിക്ക് സ്വന്തമാകുകയെന്നാണ് അസിസി ഡെവലപ്മെൻറ്സ് പറയുന്നത്. ഒന്നും രണ്ടും മൂന്നും കിടപ്പുമുറികളുള്ള അപ്പാർട്ട്മെൻറുകളും ബുർജിൽ ഉണ്ടാകും.

വെർട്ടിക്കൽ ഷോപ്പിങ് മാളും ബുർജ് അസീസിയിൽ ഉണ്ടാകും. ഇതിന് പുറമെ സെവൻ സ്റ്റാർ ഹോട്ടലും ബുർജ് അസീസിയിൽ നിർമ്മിക്കും. പെൻറ്ഹൗസുകൾ, അപ്പാർട്ട്മെൻറുകൾ, ഹോളിഡേ ഹോംസ്, വെൽനെസ് സെൻറർ, സ്വിമ്മിങ് പൂളുകൾ, തിയേറ്ററുകൾ, ജിമ്മുകൾ, മിനി മാർക്കറ്റുകൾ, റെസിഡൻറ് ലോഞ്ച്, കുട്ടികൾക്ക് കളിക്കാനുള്ള സ്ഥലം എന്നിങ്ങനെ നിരവധി സവിശേഷതകളാണ് ബുർജ് അസീസിയിൽ കാത്തിരിക്കുന്നത്. സന്ദർശകർക്ക് മേഘങ്ങൾക്കിടയിൽ ജീവിക്കുന്ന അനുഭവമാകും ഇത്. ക്വാലാലംപൂരിലെ മെർദേക്ക 118 ആണ് നിലവിൽ ലോകത്തിലെ ഏറ്റവും ഉയരം കൂടിയ രണ്ടാമത്തെ കെട്ടിടം. 678.9 മീറ്ററാണ് ഇതിൻറെ ഉയരം. പണി പൂർത്തിയാകുമ്പോൾ ബുർജ് അസീസി ഈ റെക്കോർഡ് തകർക്കുമെന്നാണ് പ്രതീക്ഷിക്കുന്നത്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/EvsyvV3gKrEHNC3r1sci6g

പെർമിറ്റ് എടുത്തില്ലെങ്കിൽ പണി കിട്ടും, പ്രവാസികളടക്കമുള്ളവരോട് കടുപ്പിച്ച് യുഎഇ

വിസിറ്റിംഗ് വിസയിൽ ജോലി നോക്കുകയാണോ? യുഎഇയുടെ പുതിയ പദ്ധതി ചെലവ് കുറയ്ക്കും